ESQUERDA UNIDA APOIARÁ AS MOBILIZACIÓNS QUE AGRICULTORES E GANDEIROS GALEGOS LEVEN A CABO FRONTE A MAIOR DAS CRISES DO SECTOR

EU CHAMA A CIDADANÍA PARA QUE ACUDA MASIVAMENTE AS PRÓXIMAS CONVOCATORIAS DE MERCADOS TRANSPARENTES

ESQUERDA UNIDA SAÚDA A INICIATIVA LEVADA A CABO POLOS LABREGOS DO SECTOR DA PATACA CO APOIO DO SINDICATO LABREGO GALEGO

Os mercados transparentes son espazos nos que os consumidores e consumidoras, poden adquirir produtos ao prezo que se lle paga ao produtor, o que permite a cidadanía ser conscientes do escandaloso marxe do 1500% con que traballa o sector da distribución, un marxe que se pode considerar de auténtica usura sobre a cidadanía.

Esquerda Unida ven de denunciar as condicións de extorsión que o sector da distribución pretende aplicar aos produtores e produtoras na Galiza, no caso da pataca o pretendido prezo de compra (0,04 €/Kg.) e tres veces inferior ao prezo medio de custe de produción (0,12 €/Kg.). Para EU ditas condicións son inaceptables pois supoñen a ruína do sector produtivo, xa que logo, non poderán pagar os custos da vindeira campaña.

Así pois, Esquerda Unida saúda a iniciativa dos mercados transparentes porque considera que a fórmula, ademais de servir como ferramenta de presión cara ao sector da distribución, permitirá a labregos e labregas dar saída a milleiros de toneladas de patacas que logo comezará a agromar impedindo a súa comercialización en menos de dous meses.

Facemos nosa a reclamación ao Goberno galego do Sindicato Labrego Galego, para que traballe por solucionar esta situación a través de convenios ou accións de promoción que insten a cesar esta extorsión a produtores e produtoras. Propoñemos tamén unha regulación do mercado e das marxes comercias que impida a extorsión e usura a que unha vez máis o libre mercado nos somete.

Para Esquerda Unida, a falta de rendibilidade das explotacións agrícolas e gandeiras e unha clara mostra da profunda crise do sistema económico capitalista. Todos os sectores agrarios están en crise, xa que logo, o comportamento oligopolista da gran distribución comercial, que especula con un ben de primeira necesidade, forza a unha enorme redución de prezos en orixe que non se traslada aos prezos finais que pagamos consumidores.

A renda agraria diminuíu o 26% na último lustro, os custes de produción aumentaron nun 34% e perdéronse 124.000 empregos no sector. No último ano os prezos en orixe baixaron escandalosamente, tanto no sector agrario como gandeiro, por exemplo un 47,9% para as patacas o un 27,5% no caso do leite).

O impulso da agricultura e a gandería é para Esquerda Unida o factor esencial para conquerir un novo modelo produtivo sostible que permita ao noso pais saír da crise, xa que logo, a defensa da soberanía alimentaria e da pequena explotación familiar agraria constitúen os eixos fundamentais dunha nova economía sostible tanto no social como no mediomabiental.

Dende Esquerda Unida propoñemos prezos xustos en orixe, apoio financeiro ao sector, política agraria común adecuada as necesidades do sector, así como a definición de medidas que faciliten o transito a prol dunha agricultura respectuosa co medio ambiente e un Plan de apoio a un novo modelo coopertivista que devolva a dignidade e a capacidade económica ao agro.

Gabinete de Prensa

Secretaría de Comunicación

Executiva Nacional de Esquerda Unida

ESQUERDA UNIDA PRESENTOU NO CONCELLO UNHA MOCIÓN EN SOLIDARIEDADE CON AMINATOU HAIDAR

Esquerda Unida presentou unha moción no Concello de Lugo en solidariedade con Aminatou Haidar, activista saharaui que hoxe cumple 30 días en folga de fame no aeroporto de Lanzarote pola prohibición por parte das autoridades marroquís de reunirse coa súa familia.

Esquerda Unida pretende que o Concello de Lugo se posicione neste tema de trascendencia, onde unha vida corre perigo por defender os dereitos humanos. Hai que lembrar que o pasado día 14 de decembro se celebrou un pleno do Concello sen que ningún partido mencionase dito asunto, e por iso Esquerda Unida pretende que a súa moción se discuta no Pleno do vindeiro 28 de decembro. Hai que lembrar que, por exemplo, se ten discutido hai meses unha moción presentada polo PP en defensa dos dereitos humanos en China que contou co acordo dos tres grupos municipais unha vez transaccionada. Con moito máis motivo debe posicionarse o Concello sobre un tema que atañe directamente áo noso país e nunha situación límite para a vida dunha persoa.

En concreto, Esquerda Unida solicita do Pleno do Concello que se tomen os seguintes acordos:

1.- Denunciar a sistemática violación dos dereitos humanos por parte do goberno marroquí nos territorios ocupados do Sahara Occidental.

2.- Condenar a expulsión inxustificada do Sahara Occidental da activista polos dereitos humanos e o recoñecemento do Sahara Occidental, Aminetou Haidar e a retirada da súa documentación por parte das autoridades marroquís.

3.- Condenar a complicidade das autoridades españolas na retención ilegal de Aminetou Haidar vulnerando os seus dereitos humanos e a propia lexislación en materia de entrada en territorio español e impedindo o retorno ó seu país.

4.- Solicitar que se restitúa inmediatamente o dereito de Aminetou Haidar a regresar ó seu país, o Sahara Occidental, con todas as garantías para a súa integridade persoal e a recuperación da súa documentación.

5.- Transmitir a nosa solidariedade e apoio a Aminetou Haidar.

6.- Que os acordos sexan enviados á Asociación Galega de Solidariedade co Pobo Saharaui, ao goberno do Estado Español e a embaixada de Marrocos en España.

Ver MOCIÓN

ESQUERDA UNIDA ESTÁ A PRESENTAR MOCIONS NOS CONCELLOS GALEGOS EN SOLIDARIDADE CON AMINATOU HAIDAR E A CAUSA SAHARAUI

EU SOLICITA AO GOBERNO QUE ACTÚE CON VALENTÍA E VONTADE PARA ACADAR A VOLTA DE AMINATOU HAIDAR A SÚA PATRIA E QUE TRABALLE DE VERDADE POLA CONSECUCIÓN DA LIBERDADE DO POBO SAHARAUI

ESQUERDA UNIDA DENUNCIA A SISTEMÁTICA VIOLACIÓN DOS DEREITOS HUMANOS POR PARTE DO GOBERNO MARROQUÍ NOS TERRITORIOS OCUPADOS DO SAHARA OCCIDENTAL

Esquerda Unida está a presentar mocións nos concellos galegos en solidaridade con Aminatou Haidar e a causa saharauí. A valentía da activista saharaui está poñendo no tapete mediático, e quizais por primeira vez de forma seria, o papel de España e dos seus gobernos democráticos desde a Transición no tocante á relación con Marrocos e co Sahara.

Esquerda Unida xa ten alertado da hipocrisía do goberno Zapatero quen se permite realizar acordos armamentísticos cun país que reprime aos activistas políticos e sociais e que mantén á poboación saharaui nunha situación insostible, só paliada pola férrea vontade de resistir con dignidade, da que Aminatou dá boas probas, e polo apoio incondicional da nosa organización e diversas asociacións que defenden a causa saharaui e a súa autodeterminación.

Esquerda Unida denuncia que os dereitos humanos, no caso de Aminatou, están a ser esnaquizados en nome da diplomacia. O goberno Zapatero xa asinou a restrición da Xustiza Universal e o endurecemento da Lei de Estranxeiría, nun claro viraxe antisocial, situación que senón se pon freo, facilitará a cristalización dunha sociedade racista e homófoba como xa acontece en moitos países europeos. Precisamente, neste caso, a inmigración está moi presente nas malas decisións que adopta España: Europa e España desexan converter en socio preferente da UE a Marrocos, para así, e de forma definitiva, lexitimar o seu papel de xendarme migratorio de Europa e de España.

Esquerda Unida solicita ao goberno do PSOE, que se di reformista e a prol dos dereitos humanos, que actúe con valentía e vontade para traballar pola consecución da liberdade do pobo saharauí, tal e como mandata a resolución da ONU, incumprida sistematicamente ate o de agora.

Ver MOCIÓN

Gabinete de Prensa

Secretaría de Comunicación

Executiva Nacional de Esquerda Unida

REFUNDANDO A ESQUERDA

ESQUERDA UNIDA PRESENTOU EN ROLDA DE PRENSA O DOCUMENTO “PARA CONSTRUÍR UNHA ALTERNATIVA NACIONAL E DE ESQUERDAS”, CO QUE SE LANZA O PROCESO PARA A REFUNDACIÓN DA ESQUERDA

A REFUNDACIÓN DA ESQUERDA PRETENDE SER O PROCESO QUE DOTE A SOCIEDADE PROGRESISTA DE NOVOS FOLGOS PARA LOITAR CONTRA O PENSAMENTO ÚNICO NEOLIBERAL

ESQUERDA UNIDA PRETENDE ACERCAR A POLÍTICA A CIDADANÍA MEDIANTE UN DEBATE AGLUTINADOR QUE PERMITA A SOCIEDADE GALEGA PARTICIPAR ACTIVAMENTE NOS EIDOS DE DECISIÓN

Unha representación da Executiva Nacional de Esquerda Unida fixo público, en rolda de prensa, o documento Para construír unha alternativa nacional e de esquerdas, co que se lanza o proceso para a refundación da esquerda na Galiza. Previamente a presentación pública a organización política mantivo unha xuntanza con CCOO dando inicio a unha rolda de contactos con os diferentes axentes sociais, políticos, económicos, organizacións ecoloxistas, feministas, pro dereitos humanos e culturais que se prolongará ao longo dos próximos meses por toda a xeografía galega. Así no mes de marzo iniciarase o proceso para a refundación da esquerda cun gran acto festivo en Compostela coa participación de importantes persoeiros do mundo da cultura galega.

Os ditos encontros pretenden facer ver as distintas organizacións a importancia de que contribuían no proceso denominado refundación da esquerda. Un proceso que segundo explicou a Coordinadora Xeral, Yolanda Díaz, vai moito máis alá dun intento de mellorar resultados electorais, xa que logo, o que se pretende e dotar a sociedade dun instrumento que demostre que si se poden cambiar as cousas, en contraposición do que nos quere facer ver o mensaxe neoliberal.

Díaz recoñeceu que, en Galiza, a xente de esquerdas atópase derrotada despois da decepción que supuxo o goberno bipartito, pero insistiu en que para combater o avance da dereita "temos que convencer as miles de voces críticas de que si se absteñen nada se poderá facer", porque en realidade "somos imprescindibles", xa que "existe unha gran demanda de esquerda neste país", dixo.

Así pois atopámonos nun proceso no que se pretende que as xentes de esquerdas realicen unha reflexión profunda na que se desvelen os nosos erros e se acade unha liña de pensamento que combata ao pensamento único neoliberal. E dicir temos que “repensar” a esquerda e preguntarnos que facer na Galiza do século XXI para levar a cabo unha política que enxalce valores como xustiza, igualdade de oportunidades, liberdade, solidadaridade ou sustentabilidade a través da honestidade política e rexeneración democrática.

Este proceso, como explicou o responsable da Secretaría de Organización, César Santiso, pretende acercar a política a cidadanía mediante un debate aglutinador no que todos os pensamentos de esquerdas alternativos e transformadores se sintan incluídos e que permita a sociedade participar activamente nos eidos de decisión mediante a creación de fluxos de información que transcorran de abaixo a enriba. A refundación pretende ser un proceso participativo, por iso desenvolveranse foros e charlas-coloquio en todas as comarcas galegas, coa intención de que os cidadáns e cidadás poidan debater libremente.

Obviamente será un proceso complexo e complicado, especialmente difícil na Galiza ao non dispor Esquerda Unida de representación parlamentaria. Estamos a falar dun proceso que comeza hoxe pero que non ten data de remate, xa que logo, é unha labor moi grande a que temos que acometer, nembargantes, os homes e mulleres de Esquerda Unida afrontamos este proceso cheos de ilusión e optimismo, pois estamos plenamente convencidos de que outro mundo non só e posible senón que é necesario.

Gabinete de Prensa

Secretaría de Comunicación

Executiva Nacional de Esquerda Unida

EU APOSTA POLA CREACIÓN DUNHA CAIXA ÚNICA GALEGA AFASTADA DOS MERCADOS FINANCEIROS ESPECULATIVOS, QUE SEXA O XERMOLO DUNHA FUTURA BANCA PÚBLICA

ESQUERDA UNIDA PROPÓN UNHA CAIXA QUE DEDIQUE A SUA ACTIVIDADE POR E PARA A CIDADANÍA.

A DEFENSA DO EMPREGO E A APOSTA POLO CRETO Á ECONOMÍA PRODUCTIVA, EIXOS DA NOSA PROPOSICIÓN.

EU APOSTA POLA CREACIÓN DUNHA CAIXA ÚNICA GALEGA AFASTADA DOS MERCADOS FINANCEIROS ESPECULATIVOS, QUE SEXA O XERMOLO DUNHA FUTURA BANCA PÚBLICA DIRIXIDA POLOS PODERES PÚBLICOS.

Esquerda Unida entende que hai que superar os localismos para que prevalezan os intereses xerais do conxunto do país, por iso vai defender un proceso de fusión de ámbalas dúas caixas galegas, que permita crear unha caixa única galega xermolo da futura banca pública, xa que logo, a quebra das políticas neoliberias, concretamente no eido financeiro a burbulla especulativa, o desregulamento e os intereses espurios que alimentaron as devanditas políticas, esixe a creación dunha caixa única galega controlada democraticamente polos poderes públicos que dedique a súa actividade por e para a cidadanía.

Dende EU queremos deixar claro que as actuais caixas defiren enormemente do espírito e principios constitucionais cos que foron creadas, pois non é suficiente con investir parte dos seus beneficios en obra social, que no caso das caixas galegas non chega nin a metade. Non en vano na actualidade a cidadanía case non distingue entre a banca privada e as caixas, incluso algúns dos seus altos directivos autonoméanse banqueiros.

Esquerda Unida pula pola creación dunha caixa única galega que basee os seus principios no servizo a cidadanía, na que se abandonen os mercados financeiros especulativos para investir en economía real. Esiximos políticas crediticias que atendan aos sectores produtivos xeradores de emprego, as pemes e a os cidadáns que se atopan en dificultades de financiamento. Porque o fin das caixas non é producir beneficios para investilos como obra social adicada ao mundo da cultura entendido como mero espectáculo, senón solucionar os problemas de financiamento da cidadanía.

Por outra banda, consideramos fundamental a utilización dunha gran caixa galega para dotarnos dun instrumento quen de apoiar políticas públicas de planificación estratéxica da economía galega na que os poderes públicos establezan as liñas mestras de actuación en lugar de apoltronarse nas cadeiras de dirección para oír, ver e calar. Para a nosa organización, o poder político galego ten que facer valer as previsións recollidas no artigo 30 do Estatuto, esto é, a competencia exclusiva no que atinxe ás caixas de aforros. O centro decisorio da nova caixa ten que radicar no noso país. A Xunta de Galicia ten que afirmar a nova caixa como un instrumento para o desenvolvemento social e económico do país. Neste senso EU considera indispensable garantir o carácter público das caixas, diante dos declarados intereses do capital financeiro por privatizar este ámbito.

En definitiva, Esquerda Unida considera as seguintes cuestións como claves para desenvolver de maneira axeitada o proceso de creación dunha caixa única galega:

- Garantir o mantemento do emprego diante da vindeira redución de sucursais.

- Saneamento das caixas antes de proceder á fusión das mesmas.

- Mantemento das caixas como entidades públicas xestionadas por profesionais, pero dirixidas polos poderes públicos de maneira clara e decida segundo a política económica deseñada ou planificada.

- Aposta por unha política crediticia que atenda a economía produtiva e aos sectores xeradores de emprego.

- Redefinición da política social das caixas, superando unha competencia estéril e redundante entre elas e cun enfoque demasiado atento aos espectáculos.

Gabinete de Prensa

Secretaría de Comunicación

Executiva Nacional de Esquerda Unida

25 DE NOVEMBRO: DÍA INTERNACIONAL DA ELIMINACIÓN DA VIOLENCIA CONTRA AS MULLERES

ESQUERDA UNIDA DENUNCIA A INSUFICIENCIA DOS RECURSOS ADICADOS AOS CENTROS DE INFORMACIÓN DA MULLER E A PRIVATIZACIÓN DOS PUNTOS DE ENCONTRO.

Esquerda Unida vén de presentar mocións en toda Galicia nas que se incorporan un conxunto de propostas diante da xornada, que ten que ser de reivindicación e loita, do 25 de novembro, día internacional contra a violencia de xénero. Así mesmo a militancia de EU está a repartir por toda Galicia dípticos informativos que explican os distintos tipos de violencia de xénero, a nosa situación actual así como as esixencias de EU.

Esquerda Unida considera imprescindible diante do regueiro de morte e sufrimento que produce a lacra da violencia de xénero, que se acorden un conxunto de actuacións que permitan o desenvolvemento da Lei 11/2007 para a prevención e o tratamento integral da violencia de xénero, xa que logo, a lei aprobada pola Xunta do bipartito adoece dunha serie de cumprimentos, que eivan de maneira grava asúa eficacia:

− A nosa organización reclama a constitución do Observatorio Galego contra a Violencia de Xénero, que permita facer un seguimento e análise e proposta sobre a cuestión.

− A creación dun Centro de Recuperación Integral, que permita dar unha cobertura de estabilidade e integralidade ás situacións das mulleres que de maneira transitoria diante de emerxencias acoden ás casas de acollida.

− O salto cualitativo garantindo unha formación en igualdade a todas e todos os profesionais que traballen directa ou indirectamente nesta cuestión, superando o actual estadio de voluntariedade que impera neste campo.

− A aplicación dunha medida estrutural e pedagóxica da meirande importancia: a revisión dos currículos educativos para atender o tratamento educacional desta cuestión nas diferentes etapas educativas.

− A posta en funcionamento da Comisión Interdisciplinar de Igualdade, vencellada coa consellaría de facenda e que permita a abordaxe e a achega dos necesarios recursos económicos cun enfoque transversal e integral.

Esquerda Unida denuncia que por el contrario o Goberno do PP na Xunta de Galicia a través da Secretaria Xeral de Familia e o Consorcio de Igualdade e Benestar, está a eliminar o programa denominado Plan de Igualdade que traballa en información, sensibilización e formación en prol da igualdade.

Esquerda Unida reclama a fin da privatización dos puntos de encontro e un esforzo orzamentario para mellorar as dotacións vencelladas coas casas de acollida e dos centros de información da muller, que adoecen dos recursos e do persoal necesarios para garantir todos os servizos que demanda a nosa cidadanía.

A Executiva Nacional de EU fai un chamamento á cidadanía a participar nos diferentes eventos e mobilizacións que co gallo do 25 de novembro van encher a nosa xeografía, no convencemento do valor cívico do compromiso e a loita pola igualdade.

DÍPTICO: Páxina 1 - Páxina 2

Gabinete de Prensa

Secretaría de Comunicación

Executiva Nacional de Esquerda Unida

ESQUERDA UNIDA DENUNCIA A DESMANTELACIÓN DO EQUIPO TÉCNICO DE LOITA CONTRA CONTAMINACIÓN MARIÑA

ESQUERDA UNIDA AFIRMA QUE, TRAS SETE ANOS TRANSCORRIDOS DENDE A CATÁSTROFE MARÍTIMA DO PRESTIGE, GALIZA CARECE DUN ADECUADO SISTEMA DE RESPOSTA ANTE OUTRA CATÁSTROFE SIMILAR.

ESQUERDA UNIDA, ÚNICA FORZA POLÍTICA PERSOADA NO PROCESO XUDICIAL

O naufraxio do petroleiro Prestige marcou o devir do noso país e uniu ao pobo galego para reclamar que se activasen os mecanismos necesarios para evitar outra catástrofe similar e se depurasen responsabilidades ante a nefasta xestión da crise. Así pois, unha marea humana nunca antes vista no noso pais, invadiu as rúas galegas ao berro de dignidade. As protestas foron canalizadas principalmente desde da Plataforma Nunca Máis na que Esquerda Unida participou activamente desde a súa creación.

Pero sete anos despois da maior catástrofe ecolóxica mariña sufrida na Galiza, as cousas pouco cambiaron. Tanto o goberno bipartito como o actual goberno do PP foron incapaces de artellar os mecanismos necesarios para previr outra catástrofe e facerlle fronte en mellores condicións que fai sete anos, xa que logo, seguimos sen portos refuxio, centros loxísticos nin protocolos de evacuación e sanitarios e, incluso a equipa técnica de coordinación de loita contra contaminación mariña acaba de ser desmantelada, é dicir quedámonos sen técnicos antiverquidos.

Esquerda Unida denuncia o esquecemento informativo e a desidia institucional, xa que logo, na actualidade fican toneladas de chapapote soterradas baixo a area mentres o Prestige segue vertendo, aínda atópanse sen tratar unhas 10.000 toneladas de refugallos acumuladas nas instalacións de Sogarisa nas Somozas. Incluso o proceso xudicial, onde Esquerda Unida é a única forza política persoada na causa, semella eternizarse, neste senso resulta clarificador o intento da fiscalía de exonerar ao único responsable político, o ex Director Xeral da Mariña Mercante José Luis López Sors.

Gabinete de Prensa

Secretaría de Comunicación

Executiva Nacional de Esquerda Unida