ESQUERDA UNIDA PARTICIPOU NO Iº DE MAIO MÁIS REIVINDICATIVO DOS ÚLTIMOS ANOS

     Esquerda Unida participou na celebración do 1º de maio, Día da Solidariedade Internacional dos Traballadores e das Traballadoras baixo o lema "1º DE MAIO DE MOBILIZACIÓN E LOITA POLO EMPREGO, OS DEREITOS LABORAIS E OS SERVIZOS PÚBLICOS". Un 1º de Maio reivindicativo no que nos enfrontamos ao ataque máis brutal e antidemocrático que sufrimos en moito tempo, cun goberno que aproba medidas contra a crise que son só un intento de rapina sobre os salarios, as conquistas da clase traballadora e os dereitos sociais. Para a dereita non importan as persoas e os seus dereitos, senón o beneficio dos bancos e as multinacionais.

     A comitiva de Esquerda Unida portaba dúas pancartas cos lemas "Polo público. Polas conquistas sociais" e "En defensa da clase traballadora", coa lenda común en ambas as dúas de "Loitemos polos nosos dereitos".

      Esquerda Unida lamentou a celebración sindical por separado nun 1º de maio que debera ser un reflexo da necesaria Unidade Sindical para facer fronte aos recortes do PP.

     Chamamos á mobilización hoxe e nos meses próximos por unha saída social da crise, polo emprego, a defensa do público, o dereito á vivenda e á igualdade.