Desmantelamento do ensino secundario na provincia

ALTERNATIVA GALEGA DE ESQUERDA DENUNCIA O DESMANTELAMENTO DO ENSINO SECUNDARIO NA PROVINCIA DE LUGO

Os planes da Consellaría de Educación supoñen un novo golpe aos centros lugueses, afirma o deputado Ramón Vázquez, logo de lles aplicar recortes do 20% nos gastos de funcionamento 

     A ofensiva do Partido Popular contra o ensino público non se detén. Desta volta, denuncia o deputado de Alternativa Galega de Esquerda (AGE) Ramón Vázquez, diríxese contra centros da provincia de Lugo. “A integración, como di a Xunta, de numerosos centros de ensino secundario”, explica, “supón un golpe definitivo ao acceso aos estudios para milleiros de rapaces de Lugo”. Porque antes, lembra, a Consellaría de Educación xa aplicara recortes do 20% nos gastos de funcionamento de 15 institutos da provincia (de Monforte, Baralla, Chantada, A Pastoriza, Lugo, Viveiro, Vilalba, Burela, A Fonsagrada, Guntín, Palas de Rei, Cervantes e Navia de Suarna).

     “A decisión da consellaría foi, ademais, tomada de xeito improvisado”, denuncia Vázquez, “xusto despois de rematado o prazo para o concurso de traslado de profesorado”. O Goberno de Núñez Feijóo non oculta as súas intencións e recentemente anunciou que realizará estudos técnicos para a denominada integración de centros en Chantada, Monforte, Sarria e Vilalba. “Isto producirá unha importante diminución da oferta educativa”, critica o parlamentario, “a supresión de centos de profesores. A masificación do alumnado e o empeoramento da calidade do ensino”.

     Alternativa considera o proxecto do departamento que maldirixe Jesús Vázquez, e que nos últimos meses acumula retrocesos sociais e xudiciais, “o golpe definitivo ao ensino público en Lugo”. Neste panorama, Ramón Vázquez chama á unidade de acción entre as comunidades educativas da provincia “en defensa da educación pública”, manifesta o apoio de AGE ás protestas que comezan mañá no Instituto de Ensino Secundario Daviña Rei de Monforte e explica que o grupo parlamentario rexistrará iniciativas para reforzar a rede de centros públicos de ensino secundario.

A continuación, un cadro cos recortes aprobados pola Xunta en centros da provincia de Lugo:

CENTRO	CONCELLO	2011-2012	2012-2013	DIFERENCIA	%
IES Francisco Daviña Rei	Monforte	146.234	132.499	13.735	9,39%
CPI Luis díaz Moreno	Baralla	42.355	38.315	4.040	9,54%
IES Val do Asma	Chantada	71.617	64.388	7.229	10,09%
IES Fonmiñá	A Pastoriza	39.696	35.477	4.249	10,70%
IES Leiras Pulpeiro	Lugo	88.582	78.708	9.874	11,15%
CIFP Politécnico	Lugo	305.572	269.933	35.639	11,66%
IES Lois Peña Novo	Vilalba	114.555	100.633	14.444	12,15%
IES María Sarmiento	Viveiro	204.618	178.254	26.364	12,88%
IES As Mercedes	Lugo	234.022	199.308	34.714	14,83%
IES Perdouro	Burela	133.066	112.435	20.631	15,50%
IES Fontem Albei	A Fonsagrada	53.287	42.420	10.867	20,39%
CPI Tino Grandío	Guntín	43.981	34.917	9.064	20,61%
IES Palas de Rei	Palas de Rei	47.045	36.850	10.195	21,67%
CPI de Cervantes	Cervantes	36.978	27.126	9.852	26,64%
CPI Dr Daniel Monje	Navia de Suarna	36.498	16.486	20.012	54,83%

Táboa 1: RECORTES GASTOS FUNCIONAMENTO CENTROS SECUNDARIA PROVINCIA DE LUGO