ESQUERDA UNIDA LUGO

IU PRESENTARÁ NO CONGRESO UNHA ENMENDA Á TOTALIDADÁ DA REFORMA LABORAL E ESTUDA A POSIBILIDADE DE RECURRILA DIANTE DO CONSTITUCIONAL

Luns, 13 de febreiro de 2012 

     Esquerda Unida presentará, a través do seu grupo parlamentario de IU, ICV-EUiA, CHA, unha enmenda á totalidade do texto da reforma laboral aprobado o pasado venres polo Consello de Ministros. Ademais, esta formación trasladou o contido da mesma aos seus servizos xurídicos para que analicen en profundidade o alcance legal de cada un dos seus puntos e estudar a posibilidade de presentar un recurso de inconstitucionalidade, algo para o que se necesitaría a firma de 50 deputados e requiriría de acordos con outros grupos parlamentarios do Congreso. 

     O coordinador de IU, Cayo Lara, foi o encargado de anunciar estes puntos durante a roda de prensa ofrecida hoxe na súa sé federal. Lara tachou claramente o decreto laboral do Goberno de Mariano Rajoy que xa entrou en vigor como un “golpe de Estado” aos dereitos dos traballadores e un “golpe brutal ás conquistas que tanto custaron lograr durante anos”. 

     O máximo responsable de IU deixou claro que todas estas accións políticas irán parellas ao chamamento xa realizado aos militantes e simpatizantes desta formación, que tamén forman parte do movemento sindical en toda a súa pluralidade, e ao conxunto dos traballadores para permanecer desde agora en “movilización constante e permanente para lograr que o Goberno do PP dea marcha atrás a este ataque tan brutal”. 

     “Ou conquistamos na rúa o poder que se exerceu desde os despachos –explicou- e que levou ao PP a que presente esta reforma laboral, ou non o imos conquistar só no Parlamento, onde a correlación de forzas é a que é, entre outras cousas por un sistema electoral que posibilitou que o PP teña maioría absoluta no Congreso sen  tela na rúa”. O coordinador federal sinalou que o PP tardou moi pouco tralas eleccións do 20-N en demostrar que de ningunha maneira é o ‘partido dos traballadores’, como sinalou no seu día a súa secretaria, María Dores de Cospedal, senón que puxo en evidencia que “é o partido da gran patronal” e actúa ao dictado do “sector máis radical e duro da CEOE (Confederación Española de Organizacións Empresariais”. 

     Lara resumiu que entre os obxectivos dos profundos cambios que introduce esta reforma están “facilitar e abaratar o despedimento en España, converténdoo en despedimento libre e subvencionado. Desde logo non vai servir para xerar máis emprego”. A esta intención do Goberno da dereita enfrontou a alternativa na que xa traballa Esquerda Unida, baseada no obxectivo de “crear emprego estable e con dereitos”, e que tratará de recoller as formulacións xa plasmadas polos sindicatos na iniciativa legislativa popular (ILP) elaborada a raíz da última reforma aprobada polo PSOE e o seu Goberno en 2010. 

     A enmenda á totalidade de IU poñerá o contrato indefinido como forma de contratación base e presentará tanto un plan de emprego público como privado, así como unha gran incidencia na mellora da formación. Ademais, buscará protexer aos traballadores subcontratados, reforzar a inspección de traballo para que actúe sobre os empresarios que eludan dar de alta na Seguridade Social, reforzar o servizo público de emprego e reformar a formación profesional, de acordo cos profesores e as organizacións sindicais. “Nin un traballo sen contrato e nin un contrato sen alta na Seguridade Social”, puntualizou. Afirmou tamén que “buscaremos protexer aos traballadores e manter a flexibilidade interna dentro das empresas, pero sempre no ámbito da negociación cos sindicatos e non ao albur dos intereses exclusivos dos empresarios”. En canto á posibilidade de chegar ata o Tribunal Constitucional para dar resposta á reforma, Cayo Lara sinalou a obligatoriedad de lograr a firma de 50 deputados, para o que IU buscaría o respaldo doutros grupos parlamentarios.      

     Neste sentido, respondeu ás preguntas dos xornalistas que sinalaban que iso requiriría o apoio do Grupo Socialista e indicou que aí “o fin si xustifica os medios” e que estaba aberta esa posibilidade. Reclamou, non entanto, “certa coherencia” aos dirixentes socialistas, xa que cando estiveron no Goberno en boa medida foi o PSOE o que “abriu as portas” a reformas como as que agora se executan. “Puxeron en marcha unha reforma laboral que abriu a porta ao despedimento máis barato e agora o PP deulle unha volta máis”, recordou. 

     “Chama a atención –indicou- que un partido cando está no Goberno tome medidas contra os traballadores –‘tixeretazo’, ‘pensionazo’ e déficit cero na Constitución- e cando pasa á oposición se poña a ‘chaqueta de pana’. Benvidos ao club se fixeron unha reconversión tan profunda que hoxe lles leva a dicir o contrario do que dicían no Goberno”. Ademais, coñecidas as reunións que os dous sindicatos maioritarios terán a partir de hoxe mesmo con todas as formacións políticas, sinalou que desde IU xa se enviou senllas cartas a CC.OO e UGT para analizar conxuntamente de inmediato o alcance da reforma. Lara recordou tamén que “foi IU quen estivo na rúa cos traballadores e a cidadanía” fronte ao ‘axuste duro’ que aplicou o PSOE seguindo os dictados do FMI e do Banco Central Europeo, e garantiu que seguirá estándoo agora.

     Interrogado tamén sobre a convocatoria dunha folga xeral como resposta, insistiu no dito xa noutras ocasións de que é potestade das organizacións sindicais, aínda que explicou que IU defende e apoiará todas as movilizacións neste sentido, como a do vindeiro domingo 19. Comentou, á súa vez, que “pola nosa banda xa estamos mobilizados e o noso primeiro empeño agora é a explicación e a pedagoxía para trasladar aos cidadáns todo o que supón esta medida e as súas graves consecuencias”.