PAREMOS A REFORMA LABORAL. PAREMOS OS RECORTES SOCIAIS

MANIFESTACIÓN

29M. 12:00 horas

Casa sindical

PAREMOS A REFORMA LABORAL. PAREMOS OS RECORTES SOCIAIS

29 M FOLGA XERAL

O Goberno do Partido Popular aprobou un Proxecto de Lei que deixa sen protección fronte ao poder da patronal a quen traban ou queren traballar. É unha reforma á que o PSOE abriu a porta. O PP non tivo máis que empuxala.

Mariano Rajoy argumenta que a reforma permitirá dar traballo a quen agora non o teñen. É mentira, o propio Goberno recoñeceu que neste ano haberá 630.000 parados máis e que a nosa economía estará en recesión, cun descenso do PIB do 1,7%. Non propuxo ningunha medida concreta para corrixir esa situación. Só pretende enfrontar a uns traballadores con outros, a parados con quen teñen traballo; aos de contrato indefinido cos de contrato temporal, a empregados públicos con traballadores da empresa privada, a pais con fillos.

↘ É a reforma laboral do paro

O patrón poderá despedirche case sen ningún requisito. Bastará que teña menos ingresos en tres trimestres, nin sequera é necesario que teña perdas. Desta forma ata as grandes empresas como Telefónica ou os Bancos Santander e BBVA poderán despedir con baixas indemnizacións.

O novo contrato, que se aplicará no 99% dos casos, permite o despedimento fácil e gratuíto nun período de proba dun ano.

↘ É a reforma laboral do despedimento fácil e barato

O poder patronal aplicarase case sen límite na contratación, nas relacións laborais na empresa e no despedimento. O empresario poderá rebaixar o teu salario, cambiar unilateralmente xornada, horario e quendas; trasladarche de lugar de traballo, ata a outra cidade; se non che interesan as condicións pódesche autodespedir cunha indemnización de 20 días por ano traballado e un máximo de 9 ou 12 meses, segundo o caso.

↘ É a reforma laboral que dá todo o poder ao patrón

Os convenios colectivos, que teñen o seu carácter vinculante establecido na Constitución, poderán ser ignorados polo empresario. O patrón poderase descolgar do convenio, do contrato de traballo e ata de vantaxes que o mesmo conceda. O 95% de quen traballan en empresas pequenas quedan sen protección e sen o beneficio dunha negociación colectiva máis vantaxosa. A reforma prexudica especialmente ás mulleres.

↘ É a reforma laboral para a desprotección dos traballadores e as traballadoras

Hai outra saída para a crise e para crear emprego

Pódese crear emprego, pero o Goberno négase a buscar os recursos para facelo aplicando medidas contra a fraude e que contribúan a unha maior xustiza fiscal. Négase tamén á reforma financeira que permita que o crédito chegue ás empresas e ás familias, mediante a creación dunha banca pública. Izquierda Unida ten un plan concreto e para crear o emprego necesario durante os próximos tres anos.

É posible chegar a un acordo que permita construír un modelo produtivo e de desenvolvemento distinto ao modelo perverso que nos levou a esta situación. Un modelo que asegure un desenvolvemento sostible da economía, creador de emprego digno e estable, cuns servizos públicos garantidos e de calidade, cun maior papel do público nos principais sectores económicos e cun maior control democrático da economía e do funcionamento das empresas. emprazamos ao Goberno a que tome a iniciativa, pero non hai resposta ata o momento.

Hai que parar esta reforma coa Folga Xeral

A agresión do Goberno contra os dereitos dos traballadores e as traballadoras superou todas as liñas vermellas. Só hai unha forma de parala: coa mobilización organizada e contundente, coa Folga Xeral, que é o arma máis forte dos traballadores e traballadoras

Esquerda Unida apoia a Folga Xeral convocada polos sindicatos e contribuirá con toda a súa capacidade ao seu éxito.

A Folga Xeral non é un fin, senón un medio para parar a reforma laboral e os recortes sociais do PP

É unha Folga xusta e necesaria, á altura da agresión que se pretende. Por isto é crucial asegurar o seu éxito para que poida cumprir o obxectivo de parar a reforma. A Folga Xeral do 2002, fronte ao Goberno do PP de Aznar, logrou deter o chamado “decretazo” e tivo que dimitir o Ministro de Traballo.

Chamamos a crear plataformas cidadás unitarias para apoiar a organización e realización exitosa da Folga Xeral e para continuar a loita ata que o Goberno retire a reforma laboral.

Os traballadores e traballadoras poden contar co noso compromiso.

Esquerda Unida sempre cos traballadores e as traballadoras