Valoración situación do Concello de Lugo

EU CONSIDERA QUE O CONCELLO DE LUGO SOFRE UNHA CLARA CRISE INSTITUCIONAL

O último Pleno confirma a falla de alternativas reais e a negativa dos partidos a asumir o problema da corrupción para correxilo

EU considera que o pleno municipal extraordinario para debatir sobre o estado do Concello puxo de manifesto a crise institucional que vive a institución, así como o desgaste que sofren os partidos do "tripartidismo harmónico" que desde 1999 acaparan os escanos municipais. O Pleno amosou a falla de alternativas reais para superar a crise política, económica, social e democrática que vive o municipio. Ademais, persiste a sombra dunha corrupción política estrutural que negan os tres partidos, agravada pola negativa do alcalde a asumir responsabilidades políticas pola súa situación xudicial de imputado. Por estas e outras razóns, hoxe a cidadanía lucense ten menos confianza na institución municipal que hai un ano.

Sobre todo, EU responsabiliza aos tres partidos (PSOE, PP e BNG) do desprestixio no que, lamentablemente, caeu o Concello de Lugo como institución pola sombra da corrupción política, co propio alcalde imputado. Unha imputación que levou á quebra do goberno polo abandono do BNG, malia que xa entrara con Orozco imputado e baixo sospeita.

A negativa dos tres partidos a recoñecer a existencia de corrupción política en Lugo e o intento de facela aparecer como algo puntual, levou ao seu silencio cómplice e contribuiu ao actual desprestixio social da política. A negativa do alcalde de Lugo a dimitir, pese á súa situación de imputado en diferentes causas xunto ós seus colaboradores de máxima confianza, contribúe decisivamente ao descrédito da institución en Lugo e á imaxe negativa da cidade no exterior.

Unha corrupción ligada á política do "ladrillo" dos últimos anos e á privatización de servizos públicos, como se pode comprobar nas máis recentes accións xudiciais.

Non é certo, como sinalan PSOE e PP, que o problema do urbanismo sexa o "5%" do PXOM sen aprobar. O problema é que todo o urbanismo dos últimos anos está baixo sospeita de ilegalidades, desde as torres do Garañón (paralizadas por orde xudicial) ata o Plan Xeral de Ordenación Municipal (PXOM), recurrido na súa totalidade ante o Tribunal Superior de Xustiza de Galicia. EU mantivo sempre que a aprobación do PXOM polo PSOE e o PP pode e debe conlevar responsabilidades penais.

Ademais, no último ano varios colectivos denunciaron irregularidades sobre tramos inundables que non se tiñan en conta no PXOM. A súa denuncia destapou que o exconcelleiro de urbanismo, Francisco Fernández Liñares, asinara o informe sobre o PXOM sen estar completo cando era Presidente presidente da Confederación Hidrográfica do Miño-Sil. Destacar a paradoxa de que o responsable das polémicas recalificacións do PXOM, incluíndo as súas propias fincas, daría o visto bo ao PXOM desde o seu cargo dependente do Ministerio de Medio Ambiente.

Pero as causas xudiciais, especialmente a Pokémon, puxeron de manifesto que a corrupción no Concello está directamente relacionada coa privatización de servizos públicos municipais, política que non é allea a ningún dos gobernos municipais anteriores. O Xulgado de Instrucción nº 1, interviu equipos informáticos no Concello para investigar numerosas concesións e contratacións. O resultado é que servizos como a grúa e a ORA están baixo tutela xudicial. Sen embargo, o acordo de goberno entre o PSOE e o BNG insistiu nese modelo neoliberal e decidiu constituir unha empresa mixta para o ciclo completo da auga; un sistema privatizador idéntico ao escollido por Esperanza Aguirre para o Canal Isabel II de Madrid.

Outras concesións, entre as que destaca a do transporte urbano, están caducadas, e a psicosis xenerada no equipo de goberno polas diversas actuacións xudiciais impide darlles unha solución axeitada.

Seguindo cos tribunais, continuaron as sentencias desfavorables pola política laboral do Goberno Municipal, ao que hai que engadir a situación de tensión e inseguridade laboral que viven os traballadores e traballadoras municipais.

Unha das decisións máis negativas nestes meses foi a aprobación, cos votos favorables de PSOE e PP, da compra de accións do C.D. Lugo S.A.D. por valor de 600.000 euros, e a entrada como máximo accionista do Concello no consello de administración do clube de fútbol con dous representantes.

Neste sentido, destacar que, pese ao enfrentamento entre PSOE e PP, para as decisións de maior calado (PXOM, compra de accións do Lugo) Orozco sempre conta coa complicidade do PP. Un PP dos recortes, da financiación ilegal, do carreto de votos, do PXOM á carta, implicado nas operacións Muralla, Carioca, Campión, Pokémon ou de retirada das multas de tráfico, que está absolutamente deslexitimado para a crítica e, especialmente, para falar de alternativas.

Outros problemas de gran trascendencia seguen sen resolverse: nin o prometido Regulamento de Participación Cidadá nin, por descontado, Orzamentos Participativos; o casco histórico segue "en coma" agardando polo novo PEPRI; o goberno carece dun plan para o barrio da Ponte logo da polémica pola peonalización da ponte vella (que EU apoiou); destínanse cantidades desorbitadas e descontroladas de cartos á festa de Arde Lucus cando, pola contra, a deixadez nas Festas do San Froilán provocou unha inxustificable contratación externa para xestionalas.

En resumidas contas, un ano de parálise institucional no que EU presentou numerosas iniciativas. Hai que destacar, entre outras, o Plan Integral de Recuperación do barrio de A Ponte, as propostas para o vello cuartel de San Fernando ou a iniciativa para que o Concello asuma a obra social de Caixa Galicia na nosa cidade. Hai Alternativa.