ESQUERDA UNIDA LUGO

ESQUERDA UNIDA RECLAMA DO GOBERNO LOCAL FEITOS E NON SÓ XESTOS NA LOITA CONTRA O CAMBIO CLIMÁTICO

Esquerda Unida considera positivo que o Concello de Lugo se sume á campaña internacional promovida pola Asociación WWF Adena consistente nun apagón mundial contra o cambio climático. EU-IU súmase a dita campaña internacional de defensa do medio ambiente, pero de xeito siultáneo reclama do goberno local que non se quede unicamente nos xestos e aplique medidas reais contra o cambio climático.

O obxectivo de WWF Adena é concienciar á cidadanía sobre o cambio climático e esixir aos políticos un maior control das emisións de CO2. Nese sentido, o goberno municipal é a antítese dun goberno concienciado coa defensa do medio ambiente, malia organizar ou participar en campañas simbólicas coas que pretende demostrar o contrario. Abondan algúns exemplos de actuacións do goberno local:


1. Planificación e aprobación dun Plan Xeral de Ordenación Municipal (PXOM) que enxendra unha cidade difusa que require de longos desprazamentos e promociona o transporte particular fronte ao público; un plan concibido para o municipio lucense baseándose nunha previsión demográfica irreal e irracional que supón a destrución innecesaria do territorio, a contorna e os espazos naturais, entre outros.


2. Proxección dunha nova ponte sobre o Miño concibida para o tráfico de 70.000 vehículos diarios (cifras apuntadas pola ministra de Fomento), cunhas características absolutamente lesivas co contorno natural e histórico. Unha ponte si, pero non así.

3. Arrinconamento do traballo e as conclusións da Axenda 21 local, orientados ao desenvolvemento sostible, desestimando así o traballo elaborado durante anos polo movemento asociativo lucense.

4. Mantemento da iluminación de Nadal durante dous meses consecutivos.


Esquerda Unida reitera o seu compromiso firme e decidido pola conservación do medio ambiente e a loita contra o cambio climático. Unha cidade e un municipio como Lugo, situados nun contorno natural privilexiado e cunhas características demográficas, históricas e estruturais ideais, podería e debería ser unha cidade modélica na súa relación co medio ambiente, respectuosa co contorno natural e libre dos máis diversos tipos de contaminación así como, por suposto, exemplar polo seu modelo social.

Esquerda Unida afirma que para conseguir os devanditos obxectivos é necesario deseñar unha cidade compacta, respectuosa co seu contorno, abundante en zonas verdes, na que se promocione decididamente o transporte público mediante a combinación dunha ampla rede de liñas de autobús urbano e o futuro tranvía, o impulso do ferrocarril, a aposta decidida polos carrís bici e a redución drástica de desprazamentos privados. Iso son medidas reais e non só xestos.