Valoración orzamentos 2013 Xunta para Lugo

A XUNTA PRESENTA UNS ORZAMENTOS QUE DE NOVO AFUNDEN OS DEREITOS SOCIAIS E OS SERVICIOS PÚBLICOS

Para Alternativa Galega de Esquerda os orzamentos presentado convirten á Provincia de Lugo nun páramo de desesperanza social

 Ramón Vázquez, deputado de AGE

A Xunta de Galicia ven de presentar o proxecto de orzamentos para o ano 2013 marcados polo seu carácter antisocial e ao servizo da débeda e o teito de gasto. Por cuarto ano consecutivo os orzamentos vense recortados en todas as partidas especilemente a sanidade e a educación.

A Xunta de Galicia sinala no seu propio proxecto unha previsión de ingresos de 9.479,8 millóns de euros mentres que establece un teito de gasto de 8481millons de euros. Os orzamentos para o ano 2013, son de novo os orzamentos dos recortes sufrindo un descenso insoportable no gasto social que se concreta nunha diminución dos orzamentos de sanidade de 111 millóns de euros menos, e 153 millóns de euros menos nos de educación. Por outra banda constátase tamén unha importante diminución das transferencias aos concellos, xa de por si esganados economicamente.

Os orzamentos plantéxanse ademais, de acordo cunhas previsións de aumento do paro en 4 decimas, unha diminución do consumo nos fogares do 2,3%, e unha diminución do PIB galego nun 1,2% ao que temos que engadir que todas as previsións económicas feitas ata o de agora polo goberno da Xunta, foron corrixidas á baixa pola realidade nos últimos anos.

Polo que respecta á provincia de Lugo, os orzamentos supoñen o abandono das principais necesidades da cidadanía mentres se adican a non completar proxectos inacabados que continuarán sen rematar.

Cunha diminución de mais de 30 millóns de euros en infraestruturas, os principais viais iniciados na provincia, continuaran o seu mortecino ritmo de execución. O caso do Corredor de Monforte (5,3 millóns de euros), o Corredor da Mariña (3,5 millóns de euros) continuaran co seu atraso e diminución nas inversións.

As inversións en infraestruturas sanitarias seguen o mesmo camiño, resultando especialmente grave o caso dos servizos de Hemodinámica, Radioterapia e Medicina Nuclear do HULA que nin se contemplan despois de estar previstos para o ano 2011. O mesmo sucede coas obra prometidas para o antigo Hospital Xeral, no que o previsto PAC continuará sen dotación económica. Diminúen tamén as inversións no Hospital da Costa cuns exiguos 50.000 euros de dotación.

Si reciben, pola contra, importantes inversións os Parques Industriais, tanto o de Monforte con 5,4 millóns de euros e o das Gándaras en Lugo con 470.000, euros, nun contexto de desmantelamento industrial na provincia e no que a demanda de solo industrial rexistra mínimos históricos.

Quedan tamén no aire moitas das inversións prometidas para a cidade de Lugo.

O Auditorio de Lugo ve diminuída a súa inversión, pois do total previsto para o período 2012-2014, tan so 5,1 millóns de euros se ven concretados, sucedendo o mesmo co Plan Paradai, que queda reducida a simbólica inversión de 375.000 euros.

Peor sorte corren outras obras comprometidas que brillan pola súa ausencia como o Museo da Romanización de San Fernando, A Ronda Leste nin o Barrio da Residencia.

Os orzamentos non fan tampouco fronte a unha das primeiras necesidades da cidadanía como é a vivenda, nun contexto en que os problemas de acceso á mesma están acadando tintes dramáticos, recolléndose unicamente 1.600.000 euros para Vivendas Publicas absolutamente insuficientes nun área que debera ter unha atención preferente.

As inversión educativas concrétanse en 300.000 euros para o IES as Mercedes, despois de terse comprometido 600.000 para o exercicio 2012 que finalmente non foron invertidos. Sucede o mesmo cos 200.000 euros comprometidos para a construción dun novo centro xa prometidos no 2012 e aínda sen realizar.

Finalmente, os orzamentos non contremplan medidas dirixixidas a resolver os problemas polos que atravesa o sector agrogandeiro, tan importante na nosa provincia e condeado ó seu abandono e desaparición.

Os orzamentos caracterízanse, unicamente polos axustes realizados na vía dos gastos pero carecen de melloras na política de ingresos que permitan dispoñer de mais recursos para dar resposta aos problemas da cidadanía. Non se modifica o tramo autonómico do IRPF dos salarios mais altos, nin se outorga de ferramentas á Axencia Tributaria Galega para combater o fraude fiscal, nin se introducen impostos ás grandes superficies, nin ás transaccións bancarias etc, recaendo de novo os esforzos nos mais débiles.